ڈیرن سمی نے پاکستان کی شہریت حاصل نہ کرنے کا عندیہ دے دیا ہے ۔ویسٹ انڈیز آل راؤنڈر کا کہنا ہے کہ مجھے خوشی ہے کہ پاکستان میں بین الاقوامی کرکٹ میں واپس لانے کے لیے اپنا کردار ادا کر سکا ہوں اس ملک سے محبت کے لئے مجھے کسی پاسپورٹ کی ضرورت نہیں۔
تفصیلات کے مطابق ویسٹ انڈیز آل راؤنڈر ڈيرن سمی نے پاکستان کی شہریت حاصل کرنے کے حوالے سے خصوصی بیان جاری کیا ہے۔ پشاور زلمی کے کھلاڑی ڈیرن سمی کا کہنا ہے کہ انہیں بے حد خوشی ہے کہ وہ پاکستان میں بین الاقوامی کرکٹ کی واپسی کیلئے کی جانے والی کوششوں کا حصہ ہے ۔
انہوں نے مزيد کہا کہ میں نے پاکستان کے لیے جو بھی کیا ہے دل سے کیا ہے نہ کہ کسی لالچ میں۔ ڈیرن سمی کا کہنا ہے کہ انہیں پاکستان سے محبت کے لیے کسی پاسپورٹ کی ضرورت نہیں۔ پاکستانیوں کی جانب سے مجھ پر جو محبت نچھاور کی جاتی ہے میرے لیے یہ محبت ہی سب کچھ ہے۔
واضح رہے کہ گزشتہ روز پشاور زلمی کے مالک جاوید آفریدی نے نے انکشاف کیا تھا کہ انہوں نے سابق ویسٹ انڈیز کپتان ڈیرن سمی کو اعزازی شہریت دینے کی درخواست دی ہے جاوید آفریدی کا کہنا تھا کہ وہ احسان مانی سے درخواست کریں گے کہ ہم نے ڈیرن سمی کے لیے اعزازی شہریت کی درخواست کی جو صدر مملکت کی ٹیبل پر ہے اور اگر احسان مانی ایک فون کال کریں گے تو انشاءاللہ یہ تاریخی کام جلد از جلد ہو جائے گا ۔
جاوید آفریدی کا مزید کہنا تھا کہ جب ہم 2017 میں پی ایس ایل فائنل پاکستان میں کھیلنے کیلئے پاکستان آنا چاہتے تھے تو جو اس بندے کے وائس نوٹس ہیں وہ کبھی وقت آنے پر سناؤں گا ۔کیونکہ ان میں پاکستان سے محبت جھلک رہی تھی پاکستان آنے کا فیصلہ کیا تھا جب دیگر غیر ملکی کرکٹرز پاکستان آنے کے لیے تیار نہیں تھے اسی باعث ڈيرن سمی میں اس وقت پاکستان میں سب سے مقبول غیر ملکی کرکٹرز قرار دیے جا چکے ہیں